أموت و أفهم شو سر تعلقنا بهالسؤال ، أنا بعترف إني كنت مصاب بداء "إنتا من وين" لحد ما طلعت برّة البلاد فترة كافية جلست فيها مع حالي لحالي فترات و فترات و "فلترت" فيها مليون تصرف و عادة سيئة كنت مكتسبها بدون انتباه.
مرحبا -
أهلين -
أنا فلان -
أهلا فلان ، أنا علاّن ، من وين الشب ؟ -
و هون عاد علاقة فلان بعلاّن تعبر بمرحلة حاسمة و ذات تأثير ذو أبعاااااااااااااااااد لمّا تكون في الأردن
إذا إنتا و أنا من نفس المنبت ، يعني من الأردن أو فلسطين ، لإنو زي ما الكل بعرف ، الأردن تقع في الشرق الأوسط ، و فلسطين هي جزيرة في البحر الكاريبي ، و يحمل هذا البعد الجغرافي و الثقافي الكثير من الفروقات في الأصول و المنابت ؛و بالتالي على الأردنيين من أصول أردنية التعامل بحذر مع الأردنيين من أصول فلسطينية ، و على الأردنيين من أصول فلسطينية التعامل بحذر مع الأردنيين من أصول أردنية ، نرجع لعلاقة فلان بعلاّن التي تخضع لاختبار الولاء و الإنتماء في هذه اللحظات عزيزي المشاهد . أنا من (البلد التي ولد فيها جد جد جد جد فلان ، و أكّد هذا الكلام مجموعة كتب في أصل العائلات و العشائر) . الجواب المتعارف عليه : و النعم والله . نبرة الصوت هي التي تحدد "من وين ، علاّن" .إذا كانت نبرة تنم عن فرح مع ابتسامة عريضة تظهر الفك العلوي و جزء من السفلي إذا تطابقت المنابت . و إذا كانت بضم الشفتين و كانت العيون تبحث عن شيء ما على الأرض بجانب القدمين يمنة و يسرة معناها المنابت اختلفت .
المعضلة التي واجهتني في الخارج ، أن معظم من التقيت بهم لم يكونوا عربا أصلا ، طيب ، أنا من أمريكا ...و بعدين ؟ أجد نفسي قد سألت سؤال فارغ لا يفيدني في شيء.
أنا من فرنسا ... أها ... أنا أحب العطور الفرنسية ؟
أنا من ألمانيا... أوه أوه ... هل تحبين هتلر ؟
أنا من التشيك ... فليحيا ندفيد !!0
بالتالي ، قرّرت ألاّ أسأل الناس عن "أصولهم" كون الأمريكي فاجأني بثقافته ، و الفرنسية فاجأتني بحشمتها ،و الألمانية فاجأتني بأن في ألمانيا أكثر من هتلر و جدار برلين ..و التشيكي لا يتابع كرة القدم .
رجعنا عالبلد...و صرت مسؤول هذا السؤال مرّات لا تحصى خلال عشرة أيام .. أصدقاء جدد، شرطي ، حتى شوفير التاكسي سألني ... و بلّشت أتعب من جوابي الجديد اللي مش جايبلي غير وجع الراس "ليش...شو رح يغيّر الموضوع؟" لإني صرت أتّهم بخزيي و استحيائي من "أصلي" .
كل عام و بلدي الأردن بخير .. و هواها بخير .. و أرضها بخير .. و ناسها بخير . و عقبال ما يصير عند بلدي فلسطين عيد استقلال ..على خير!
