Apr 17, 2010

حاسس حالي فطبول

!يا ريت فطبول "أوفيشال" محترم، فطبول أبو 75 قرش كمان
بالزمانات، وإحنا زغار كنت حاسس إنو أهلنا وجدودنا تشعتلو وتشردو وهم جماعة "المأساة"، يعني وإحنا بالمدرسة كنا نتطلع على فلسطين على إنها المأساة والبلدة المحتل والشعب المضطهد، بس إحنا بالأردن، بندرس بمدارس حكومة وفش إشي بمدارسنا بدل على فلسطين (على عكس مدارس الوكالة المخصصة للاجئين)، وكان الواحد مفكر إنو تاعون المخيمات هم المسخّمين والمساكين وبس، لإنو هم اللي وضعهم مكركب والواحد ما كان يفهمو، بتذكر لما كان يجي المرشد الإجتماعي بأول كل سنة يسأل كل صف (اللي عندو كرت أبيض تبع الوكالة يجيبو بكرة)، رحت بإحدى هالسنين - بالصف الخامس - سألت أبوي إذا إحنا لاجئين وعنا كرت أبيض، صار يضحك، قال لأ، إحنا مش لاجئين. اتطمّنت أنا والله، ما كنتش عارف شو مسمّاي المواطَني، بس المهم إني مش لاجئ، يعني مش مسخمط ومسكين، كنت بعرف إني أردني! بس من أصلي من فلسطين. بعدين رحت أجدد جواز السفر لحالي لأول مرّة، بعد ما صفيت عالدور الطويل بقلي الموظف (إنتا عجوازات الضفة)، قلتلو لا يعمّي إنتا مخربط، أنا أردني ها (فرجيتو الهوية قال!)، قالي لأ، بتروح عالعمارة الثانية - الطابق الثاني... آمين... أوّل مفاجأة

فتنا هالجامعة، وإذ به الموضوع كبير يا اخوان!! هاي طلعت قصة "إنت من وين" مش حيالله سؤال، وطلع الموضوع بتعدّى إنك بتشجع الوحدات ولاّ الفيصلي! طيب سأل حالو الواحد أنا أردني ولا فلسطيني ولا شو قصتي بالضبط.. طلعت نص نص، أو ثلثين بثلث، أو 90% و10%، والله ما فهمت تحديداً، تعرّف الواحد عإشي إسمو الإرتباط وفك الإرتباط وجواز أبو سنتين ووثيقة وكرت أصفر وكرت أخضر، وقريباً يبدو في كرت أحمر!ودهاليز إلها أول ما إلها آخر، لحديت هون لسا الواحد معتبر حالو أردني خاوة، البنزين بغلا بصير يحكي بالموضوع، الإبصر إيش بصير بكون هامّو الموضوع، مش أردني أنا؟ حقّي أعترض عالميّة اللي اسرائيل لاطشيتها ولا لأ؟ بس هاد الحكي زمان، من فترة فعلاً بطلت عارف راسي من رجليّ! طلعت موضة التوطين والترانسفير وحق العودة، إه! طب ما احنا طول عمرنا بنحكي حق العودة والمفاتيح والخ... شو القصة؟مش فاهم كيف صرت أنا متّهم فجأة؟!؟!؟!؟!؟ صرت إذا بتحكي أنا أردني معناتو أنا مع التوطين وبدي أكب بلاي عالبلد وألزّق فيها وآكل رزق "أهلها" -اللي أنا لا أعتبر منهم، هاي مفاجأة رقم 2-، وإذا حكيت أنا فلسطيني يعني أنا عنصري وبكره البلد و"بعض الإيد اللي انمدتلي"؛ كوني نصف إنسان نصف حيوان وبعُظ


وشرفي إني حاس حالي زي الفطبول الرخيص، مرة بشوتوني بهاي الجهة ومرة بالجهة الثانية، لا أنا عارف شو أنا ولا شو مفروض أكون ولاّ شو أحس! أصلاً بطّلت أسأل! بديش اعرف، مازالني فطبول هيك هيك، بدي أحاول أستمتع بالمباراة قدر الإمكان لبيل ما أطلع أوت
 addibasننتقل الآن للاستوديو التحليلي بين الشوطين والكابتن جمال الشريف بالبجامة الـ 

20 comments:

Dr.Mohammed said...

انضم للركب يا ابو شريك

هاد السيناريو دايما بدور براسي المشكلة لما تحكي عن حالك اردني بفكروك بتتخوث و لما تحكي عن حالك فلسطيني بفكروك شايف حالك و عنصري
و الله احترنا يا قرعة من وين نبوسك احسن شي يا ابو شريك انك لا تحكي انك مع الوحدات و لا مع الفيصلي و خليك حكم رابع احسنلك و سلامة فهمكم

Anonymous said...

Amazing...bas ana mn 3ende eza kont falasteene say falasteena w eza kont 2ordone say 2ordone...w bsooot 3ale kman...ana falasteneya w b7trem kol wa7ad byehke sho 2aslo...well good article man!!

Anonymous said...

falasteene****

hamede said...

من حق كل انسان أن يقول من أين أصله ، الكلام في الأصول و الفروع لم يكن موجود قبل أحداث ايلول ١٩٧٠ ، انني أحمل الدولة مسؤلية أزمة ألهوية فهي التي أوجدتها ،هناك هوية فلسطينية و هوية اردنية و ليس هناك أزمة بين الهويتين ، العودة حق مقدس عند الفلسطينيين ولن يتنازلو عنه ،من حق الفلسطيني حامل الجواز الأردني أن يعود أو لأ فهو أردني أكثر من اردنيون كثر فبدل الكلام الفارغ عن التوطين لماذا لا نركز على حق العودة ، من يعزف على نغم منين أنت هو جاهل إبن جاهل ، من مصلحة الدولة بث هذه السموم بين الناس و تغذيتها خدمة لأعداء شعبنا الفلسطيني الأردني الواحد لأنني مؤمن بأن هذا الشعب واحد و مصيره واحد ، أقول قولي هذا و استغفر الله لي و لكم

NasEr said...

Dr Mohammed
أنا أصلاً بعرفش بكرة القدم غير رونالدينيو وميسي، وجهاد وهشام عبد المنعم وجريس تادرس، هدول آخر ناس حفظت أساميهم بالدوري الأردني

Annymous
Its not really about saying where are you from, its where do you fit! they're telling you that you don't fit here, but "here" is where you always been, and "there" is where you never had a life! and then you're punished for it as if you had a hand in it!
welcome to smokes blow.

Hamede
بتعجبني إنتا

Moh'd Jarrar. said...

يا زلمة يسلمو ايديك
حكيت كثير وكل حكيك بمحله

Anonymous said...

Who r they 2 tell us where we fit???...everyone has a right to speak out their minds...dont let anybody tell u where u fit or where u dont!!....coz u r a human being like everyone else...even those who talk dont fit anywhere and 2 hide their own problems they criticize others so careless and again very nice article...and 2 wat shaheen said...it is true but dont do it i have a usa passport but im proud of my palestinian more...keep it up my friend!!

Unknown said...

Well Naser ..
No one has the right to tell u or any of the Palestinians where do they fit to be ... or to judge who r they or what ever! not even to open a lip talking about you guys !
in my point of view ..
whether you carry a card or a passport or a blue wella battee5 clour of card even if u have'nt got any thing of those .. Its enough for you to say u r Palestinians!
and thats enough for all the world to shut up! o iza kannak 7ases 7alak football ... fa el no3 el falasteeni is the best i guess o a3'la no3 ... ;)
o ana ordoneyye o bakrah el 7arakat el ar3a tab3 orduni falasteeni!!
o aslan ettalla3 3ala kul el balad nus el ordoneyyeen mtzawjeen falasteneyyeen ! bala 7aki fadi ya nas! :s

Anonymous said...

معلش يا سيدي
الله المستعان
كل الحق على سايكس وبيكو بقعدتهم الفايتة
طيب مش احسن لو استحينا كلنا على حالنا وقلنا فلسطين أرض الاسلام حتى لو لا سمح الله ما ظل ولا واحد يحمل اسم فلسطيني ؟؟
مش ظلينا دايما نغوِّش ونصرخ : " فلسطين عربية "طيب ما أحسن نصرخ هيك ومتى رجعناها مش مهم اذا حدا بده يرجع او ما يرجع ما دام ان أرضنا وعزتنا قد استعدناها

وليسقط سايكس وبيكو ومن سار على دربهم

نحن مسلمون وليس لأحد حق فيها غيرنا إلا نصارى العرب فقطططططططط
تحية طيبة لك

Unknown said...

so meen ele be7ko ?

Saleh said...
This comment has been removed by the author.
NasEr said...

Lunar
hala 3ammi

Shaheen
would you?

Anon
don't worry ,as you can see I'm not letting anyone tell me anything and I'm speaking my mind, sometimes you are put in a corner beyond your means but all you have to do is deal with it,
حاصر حصارك بالجنون
I take that as philosophy of life in general.
I wouldn't want an American or a Canadian passport btw.

Farah Batarneh
لم يعرفوني في الظلال التي

تمتصُّ لوني في جواز السفرْ

وكان جرحي عندهم معرضاً

لسائح يعشق جمع الصور

لم يعرفوني، آه... لا تتركي

كفي بلا شمسٍ،

لأن الشجر

يعرفني...

تعرفني كل أغاني المطر

لا تتركيني شاحباً كالقمر!

كلُّ العصافير التي لاحقتْ

كفى على باب المطار البعيد

كل حقول القمح،

كل السجونِ،

كل القبور البيض

كل الحدودِ،

كل المناديل التي لوَحتْ،

كل العيونِ

كانت معي، لكنهم

قد أسقطوها من جواز السفر!

عارٍ من الاسم، من الانتماء ْ؟

في تربة ربَّيتها باليدينْ؟

أيوب صاح اليوم ملء السماء:

لا تجعلوني عبرة مرتين!

يا سادتي! يا سادتي الأنبياء

لا تسألوا الأشجار عن اسمها

لا تسألوا الوديان عن أُمها

من جبهتي ينشق سيف الضياء

ومن يدي ينبع ماء النهر

كل قلوب الناس... جنسيتي

فلتسقطوا عني جواز السفر!

محمود درويش، وكفى
:)

NasEr said...

aiman
ما هم بطلو بدهم يغوشو "فلسطين عربية"، فلسطين مشكلة الفلسطينيين صارت، هون المفارقة الفظيعة، بقلّك دبّر حالك لحالك، بعدين بيجي يحاسبك ويحاكمك عشنك ما عرفتش تدبر حالك لحالك!!

3bs
meen elle be7ko aish? meen elle be7ko el 7aki elle mesh 3ajbak? you're not serious are you? or i don't understand what you mean actually.

NasEr said...

deleted comment
i don't know why u deletd your comment, i like it though "i could see it in my email u know"

لبنــــــــــى said...

مش احساسك جاي متاخر شوي ؟
لا و بعد هيك رح يكون احساس صعب لتفهم البشر انك منهم عادي و انك ممكن تكونبتحب الاردن و انت فلسطيني عادي
بس عن جد احساس الفوتبول احلى بكتير منالي انا حسيته قبل هيك
بس عن جد
م ماخر باحساسك ؟

deleted comment said...

المهم وصلت الرسالة

NasEr said...

jafra
ما هو الواحد بحاول أكتر من مرة بس بالآخر بفقع، فا لأ، مش متأخر

Ashwaq said...

I am gonna share this on facebook..cuz 7assh 7ali football ana kaman

NasEr said...

Ashwaq
3ala 7sabek, w salamtek! sho sayer?

Emtiaz Zourob said...

ماتزعلش علشان انت حاسس حالك فطبول .. كلنا فطابل يا اخي سواء في الاردن أو سوريا او لبنان أو حتى فلسطين .. في كل المخيمات وفي كل المنتجعات . نحن فطابل ،، كل فطبل على قد حجمه ، في فطابل ماركة اصلية وفي فطابل مقلدة وفي فطابل بيضحكوا علينا وبيسموها فطابل ،، وربنا ينجينا من الآت ..
تقبل مروري

Post a Comment