B4JD (Blog for Jordan Day) مجلس النواب - إلى متى هذه الظاهرة؟

المهم،  في السنة الماضية كتبت عن أكتر 10 أشياء مزعجة مشتاقلها بالأردن، الحمد لله هيني شبعت منهم، بس للصراحة لساتني مستمتع فيهم -بمعظمهم-، بس المرّة كوني رجعت مواطن أردني عايش بالبلد في موضوع ضارب على عصبي.. إسمو مجلس النواب والانتخابات، حدا منتبه إنو البلد قاعدة بدون مجلس نواب؟ أكيد لأ، ليش؟ لإنو فيه ولا بلاه الوضع زي ما هو، بل إنو بدون مجلس نواب شايف الوضع ألطف والله، عالأقل الواحد بلوم الحكومة وبس، مش "ممثلينه الشرعيين في دوائر صنع القرار ومراقبته"، يعني أنا بقترح إنو بلا من مجلس النواب كله، حدا يعطيني سبب واحد مقنع ليش لازم يكون في مجلس نواب، شعب جوعان ورح يصوّت للي بدفعلو، وشعب عشائري رح يصوّت لقريبه وصاحبه، لا في انتخابات بتنتج ممثلين حقيقيين عن الشعب ولا يحزنون، بجوز 1%، بجوز! فليش سمّة البدن؟

وبالمناسبة لهاي اللحظة مش عارف لازم أشارك بالانتخابات الجاية ولا لازم أحرم المرشحين صوتي تعبيراً عن امتعاظي وعدم ثقتي (بالمجلس) مش بالحكومة... يعني مرّات بتأمّل هيك وانا قاعد في مكان عالي كاشف عمّان.. إنو مش حرام؟ وبحاول ألاقي جواب للسؤال المصيري: "إلى متى هذه الظاهرة" بس بلاقيش جواب.. هو الغلط بالناس، هو القانون.. هو الغلط بمين وليش بعرفش، كل اللي بعرفو إني متأكد 10000% من شغلة وحدة بس: 

 أنا الموقع أدناه: أحجب الثقة

نااااصر

http://naserz.blogspot.com