Aug 13, 2010

قدّر الله وما شاء فعل

يا أخي بنجلط أنا من التيس اللي بس يمارس عمليّة التتييس تبعتو بحط الحق على ربّنا! ما أسهلها من طريقة عشان الواحد يطلّع حالو من ورطة وعشان يتهرّب من مسؤوليته! مبارح كنت أنا وصديقي بالسيارة طالعين من الدوار الخامس وفي سيارتين (مش وحدة) واقفين بانتظار إنو نطلع من الدوار عشان يكمّلو دغري، هُب طُب من وين طلع الأخ الثالث من أقصى اليمين وفات فينا طيار ما حدا بعرف، لولا البريك بآخر لحظة كان راحت الضربة من الجناح وفاتت في الباب وكان انطعجت بشكل مثلث زي ضربة السيارة! اتطلّعت على سائق الباص الصغير اللي ضربنا، صعدت بنظري من طرف لحيته شبرين لحد ما وصلت ذقنه، منخاره، ثم عينيه، "دوّار يا شيخ دوّار" صحت فيه، اتطلّع علي متفاجئ وقال بكل برود أعصاب "قدّر الله وما شاء فعل"، إجا عبالي أمد إيدي وأمسك لحيته وأعظّها!! شو دخل الله بتياستك؟ شو دخل الله بإنّك قرّرت إنو تتجاوز سيارتين واقفين وقوف تام عشان تلحق السحور عالساعة 12؟ شو دخل الله بإنّك أب مهمل مطلّع ولادك وزوجتك معك تفرجيهم كيف الواحد بسبق مايكل شومخر في حال إجا على عمّان وحب "يقوّم" مع الشعب الأردني؟ ردّيت عليه بصراخ بس وقفت لما بلّش واحد من الأولاد يعيّط، سكتت وهدّيت حالي. حتى آسف أو حقكو عليّ ما حكا! "الله ستر"، "قدر الله وما شاء فعل"!
الله يجعل الله يوخذك وياخذ كل واحد من شاكلتك.
بالمناسبة، كتير ناس بنتقدو (خاصة شوفيرية التكاسي) إني بلبس حزام الأمان حتى لو مشواري قصير (يا زلمة كل مشوارك 10 دقايق وجوّا عمّان!)، شكلو ما عمرو مر عليهم واحد من جماعة قدر الله وما شاء فعل، أو همّ منهم. إلبسو الحزام أول، وسوقو زي العالم ثانياً، بعدين إذا صار إشي.. وقتها عاد "قدّر الله وما شاء فعل"!
http://naserz.blogspot.com

18 comments:

khasseh said...

allah lataf :p

Rula A. said...

سلامات والله.. السواقه صايره أسوأ مل يكون هالأيام..
أختي لمل أجت من السفر طلعت معاي مشوارين بعديها قررت إنها تسميني قطار الرعب.. عشان أنا بسوق بطريقه مخيفه.. أختي مش كاينه تستوعب إنو لو ما سقت هيك راح أنخبط -لا سمح الله-
رمـضـان كـريـم وكل سنه وأنت والأهل بألف خير :)

لبنــــــــــى said...

كيفك ناصر كل عام و انت بخير

هو السحور ما بينفع غير على 12 لو 12.30 ما بصير

شو دخل الله بتياستك؟
هادا السؤال دايما بسالوا

NasEr said...

khasseh
ah hay ma3gooleh

Rula
allah ysallmek thx, w inte b5air, w drive safe :D

jafra
أعتقد إنو هاد سؤال عظيم من نوعية "أكون أو لا أكون" ، إزا بتعرفي الجواب السحري خبريني

Palestinian Princess said...
This comment has been removed by the author.
Anonymous said...

الله عل شعب الأردني، معلش الدنيا رمضان والواحد سيم، الله بعين :)

الحمدلله على السلامه.. فعلاً السواقة في عمان اشي بيرفع الضغط..

Shaheen said...

مش ملاحظ انك زودتها على الشيخ
يعني لو اللي ضربك شخص غير ملتحي كان ما عملت هالمظاهرة
يمكن كنت نزلت عليه وحكيتله مسامحك

بس شو بدنا نعمل صار الدين و مظاهر التدين عرضة للهجوم المستمر

Finalway said...

والله حطيت اصبعك على الجرح ...
فعلاً .. لما الواحد الله ياخذوا او يعطبوا اكيد بيفكر غير ..
بس ما شاء الله الناس ذوق ...
كل اشي بيحطوا الدين فيه فكروا يطلع منها كالعادة
اخريتو بيعلق مع واحد ... بيجيب خميرتو ...
D:

NasEr said...

Palestinian Princess
Thanks you too, w Amen.

blabbrgirl
That's why I'm further delaying my car plan (mesh la2enne tafran la sma7a allah..la2 la2). welcome to my blog.

Shaheen
لأ ما زودتها، ولو كان ملتحي ولا غيره كان عملت نفس "المظاهرة"، مش قادر أفهم كيف فهمت المو\ضوع انو هجوم بحت عالدين والحمار الغلط راكبه راكبه، وحجّتو وتعليقتو الموضوع على الله هو اللي جلطني بزيادة. إلاّ إذا جواب من هالنوع يعتبر سليم بالنسبة إلك، معناتو
we'll have to agree to disagree.

Finalway
هو لو علق معاي بدون مرته وولاده كان جبت خمير اللي خلّفه

sharar said...
This comment has been removed by the author.
sharar said...

الحمد لله على السلامه
هذه مو " قدر الله وما شاء فعل "
هذه تيسنا وما تيسنا وقع الا شويه "
الله يحميك يا هالشب
عجبني وصفك للزلمه حسيت حالي باقرأ في "نشيد الحياه" يا ازعر
السلامه على الطرقات
هذا انا لم اواحد يحكيلي عن تيسنه قدر الله وما شاء فعل برد عليه برد على نفس الوزن والقافيه بس لما تنزل بحكيلك اياه كما بينفع هوون !!!
دير با لك على حالك وابعد عن الشيخ هذا حط كاميرا باول الشارع ولما يكون بيسوق خليك بالبيت هه

sheeshany said...

l 7amdellah 3ala l salameh ,,
it is our easy way out .. قضاء و قدر

6ayyeb bardo 4ada2 o 4adar enny ajeeb l shor6a o a3mal krookah o tedfa3 7ag 3'al6etak, sa7! aw athawash ma3ak o tseer mushkeleh ,,,

ma3lesh ya zalameh ,, e7na haik!

H.

NasEr said...

sharar
LOL 5alas mashi, ba7ke ma3ak hal yomain 3ala kollen w bte7keele el jawab :D

Haitham
Allah ysallmak, yes e7na haik, laken إلى متى هذه الظاهرة :/

sfo said...

يا ويلي من ظلام ليلي

كل يوم بتصير معي هيك قصص
بس الحمد لله بدون حوادث لحد الآن
ربنا يلطف فينا

حمد لله عالسلامة صديق

_strawberry_ said...

sighhhhhhhhhhh .. wallahi qadarra allah w ma sha2a fa3al eni ana majlooota elyom w enjalat bezyadeh after reading your post and remembering what happens with me or with my husband and i while driving in amman on a daily basis! now seriouslyyyyyyyyy things are going beyond abnormal!! elnas literally menjaneh bezyadeh aw eno ana faj2a i got fed up! ya3nee mesh ma32ool kol yom kol yom lazem ysir m3 elwa7ad mawqef yojloto .. bs sho bedna n2ool "Qadarra allah w ma sha2a fa3al" enna nkoon mowatenin dowal 3alam talet :P

NasEr said...

@sfo
الله يسلمك، عذرا عالرد المتأخر، المدونة كانت تحت أعمال الصيانة

@_Strawberry_
Thx and welcome to my blog, sorry for the late reply something wrong was with the blog template. all fixed now.

تحميل أغاني said...

الف شكر لك على البوست

Unknown said...

I really like your blog. It is very interesting and very well written. Thanks for sharing it!

Chennai to Kanchipuram Tour Package

Post a Comment