شعائر رحلة الجسر

أنا نازل بكرة (الخميس) عالضفة يومين ثلاث تغيير جو، قرفت القعدة على أمل تلفون مقابلة عمل، بدي أنزل (صحيح ليش بنحكي "نازل"؟ كأنا ملائكة! أو مصايب) أشوف جدتي والأطافيل -اللي تضاعف عددهم خلال سنتين- مش طبيعي شو بحبو الخلفة أهل فلسطين! المهم بدي أشبع طابون، هاي جدتي بتعمل طابون، معظمكم صارو شايفين الفيديو ألف مرة بس معلش للمتابعين الجداد

 والمرّة هاي لازم أصحى يوم من الخمسة الصبح أشوف الصبح والندى هناك، دائماً بضل سهران وبصحا عرغيف طابون معمول عالساعة 10 لحضرة جنابي خص نص، المرة بدي أتابع طقوس الطابون من "التدخين" حتى "الخبيز". المهم، اكتشفت إنو صار عندي طقوس وشعائر للنزلة عالضفة، اكتسبتها من أمي والناس اللي بشوفهم عالجسر من وأنا صغير، بعرفش إذا هاي الأعراض منتشرة عند الجميع:

 

 أولاً وأهم إشي طبعا، الأوراق الرسمية والجواز والخ:
 لازم يكونو بكيس ورق صغير من اللونهم بنّي! أتوقع إني اكتشفت سر الموضوع هذا آخر مرة وأنا راجع من فلسطين، إنو ليش دائماً هاي الأوراق بتكون بكيس ورق بني (ما غيرو)! طلعو المحلات اللي في الضفة اللي بتستصدر منها تصريح الإحتلال (تصريح الخروج، اللي هو زي ما تحكي Visa لناس مش مفروض تحتاج فيزا لإنهم مجرد مواطنين طالعين من بلدهم! بس كونك بني آدم محتَل فلازم تستأذن بالخروج، والدخول، والتنقل، والتنفس مرات) هاي المحلات انتبهت إنهم كلهم أو معظمهم بحطولك معاملتك وأوراقك بهذا الكيس البني! فيبدو أن الناس بس توصل عمان بتخلي هالوراق -على حطة إيدك- للسفرة الجاي، هلا أنا بدون وعي صرت وحتى لو الأوراق ما ضلت بكيسها الورق البني، أول إشي بعملو بس بدي أجهزهم بدور على كيس ورق بني بالبيت! إذا بدي أفلسف الموضوع بحكي إنو الإحتلال دحش حالو دحش بالعقل الباطن تبع كل واحد فينا بطرق عجيبة الواحد بتوقعهاش!

ثانيا: الشريطة الملونة: فلاّح ورح تضلك فلاّح!
بالزمانات، كان الجسر عبارة عن ميمعة بمعنى الكلمة، خاصة بموضوع الشنط، بتذكر منظر الغرفة الحديد اللي كان ينزت فيها كل الشنط اللي كانت تطلع من الجسر، كأنو عنبر سجن للشنط، فوق بعض ومش مرتبة وحالتها حالة -هالأيام الوضع أرتب بمراحل يعني الواحد بطل يكون همه الأوحد إنو ما تضيع شنطتو) المهم، فكنت تشوف على معظم الشنط شرايط مربوطة ذات ألوان فاقعة! عشان صاحب الشنطة يندل عليها بسهولة، وعشان إذا واحد خربط ينتبه إنو هاي مش إلو ... أنا لليوم لما أجهز شنطتي لازم أدورلي على بلوزة صغرت ذات لون فاقع عشان أربطها على إيد الشنطة ... مع إنو فش داعي! أنا اكتشفت قديش هذا الموضوع صار متجذر بعقليتي لما سافرت على تايلاند، لما شفت شنطتي بالمطار على القشاط اللي بتستلم حقائبك منو، كانت الوحيدة اللي بتلولح بشريطة صفرا على إيدها! أنا فرطت من الضحك لحظتها، حسيتها بتصرخ وهي بتقرب علي "فلاّاااااااااااح ورح تضلك فلاّح!" 

ثالثا: الأواعي اللي بلبسهم:
في مشهد ... بشع، عشعش براسي بيوم من الأيام، ومن يومها بس بدي أنزل عالضفة صرت أنتقي ملابسي بعناية فائقة للرحلة:
المكان: الجسر الإسرائيلي / الجو العام: قرف وطلوع روح من انتظار ساعتين لحد ما سمحولنا ننزل من الباص / التفاصيل:
طابورين بني آدمين بستنو يعبرو من آلة كشف المعادن .. طابورين طوال .. نسوان حاملين أولادهم، ختيارية وختياريات من اللي بتشبعش فرجة عليهم -بس مش بهداك الموقف ،بتاتا -، ولاد صغار ملتصقين بأهاليهم أو أهاليهم رابطينهم برجليهم عشان ما يعملولهمش قلق الجنود، وشباب .. ويا حظ الشباب .. الشباب هذول يعني من الواضح إنهم أكثر ما يؤرق الجنود الإسرائيليين عالجسر، في أي لحظة بجيك واحد لابس مدني وبؤمرك تفتح جكيتك، أو حقيبة يدك، أو يفتشك، أو بسحبك لجوا عجنب، بس مش المشكلة بالشباب، عادي بضل شب وبستحمل، الفلم بلش لما صار دور رجل كهل ختيار شكلو عمره يقارب الثمانينيات أو أكثر، إجا دوره يمر عبر الآلة، وطبعا بين الآلة وبين أول شخص في الطابور مسافة 2-3 متر، - يعني مش زي مكة مول بتضلك فايت -، "الحجّي" لابس اللباس العربي التقليدي، هالدشداش السكني الغامق، مربوط على وسطه حزام، وفوقه جكيت، وشماغ أبيض سادة وعقال! فات الحجي بالسرعة اللي بتسمحلو فيها أقدامه، تيت - رن الجهاز ..طبعاً الحج ضلو داعس، "إرجغ خج إرجغ خج" نادت الجندية اللي بتراقب الجهاز، اتطلع الحج عالناس، الكل حكالو "إرجع يا عم إرجع يا حج، إشلح جكيتك شكلو في إشي برن" رجع الحج وشلح الجكيت.. وفات عبر الجهاز وهو حامل الجكيت بإيده من اللخمة، فطبيعي إنو الجهاز رن مرة ثانية، الناس المرة هاي على طول صارو ينادو "حط الجكيت عالقشاط" (الآلة اللي بتكشف عن المعادن وإلها قشاط، لحقائب اليد وما شابه) حطه عالقشاط يا حج! والجندية برضو بس بنبرة صوت أعلى "أرجغ إرجغ"، قام رجع الحج المسكين، وحط الجكيت عالقشاط، والتفت علينا، أعطيناه إيماءة جمعيّة بإنّه الأمور Okay وتمام التمام، قام وفات الحج للمرة الثالثة عبر الآلة .. تيت - رنت الآلة! صارت الجندية تبربر بالعبري وقبّعت معها، بين كل كلمتين عبري كلمة عربي مكسر، الطابورين ترجمو للحج "حجي، شو لابس إشي برن؟ في معك أي إشي حديد بجيابك؟" قام الحج وطلّع اللي بجيابو، كل شي بجيابو، وحطهم بعلبة، وحطهم عالقشاط، وأعاد الكرة / تيت - رن الزفت! بلشت الناس تتأفأف! اتطلعت عالناس اللي وراي، في وحدة حامله إبنها الرضيع وبتهز فيه، لإنو صار يعيط، كإنو الحج ناقصو توتر، وكإنو الناس ناقصها عياط طفل، وكإنو الولد إلو ذنب إنو نازل عالجسر أول مرة وبعرفش آداب الطابور على الجسر الإسرائيلي! قام الحج رجع، وقال له شب من آخر الطابور "إشلح قشاطك يا عمي"، بتعرف اللحظة هاي اللي بحكي واحد فيها إشي وفجأة بصير في صمت وسكوت غريب؟ هيك صار! قام الحج، في خضمّ الصمت المطبق، وشلح القشاط.. هون الموضوع بلش يضرب على عصبي أنا، منظر هالمسخّم وهو بفك بقشاطه في منطقة اللاشيء واللا أحد. قام وفات من الآلة كمان مرّة وهو ماسك ثوبه بإديه الثنتين محل القشاط، وتيت !!!!!!! هون عاد الجندية تقول ركبها عفريت؟ لمستنا وهي بتشبّر! والحج المسخّم وقف محلو بطل عارف شو يعمل! والولد مع الضجة رجع يعيط، راح بالآخر إجا جندي بحكي عربي منيح وحكى للحج يشلح من رجلو! طبعا كل هاي العملية ممنوع واحد يقرب خطوة بعد الخط اللي حاطينلك إياه على بعد أمتار من الآلة! فالحج لازم يدبّر حالو لحالو! وطّا الحج! وبلش يشلح حذاؤه .. هذا المنظر من أبشع ما شفت بحياتي، زلمة ختيار مش قادر يمشي، ملخوم، شلح ثلاث أرباع أواعيه، داخل عالآلة حافي، بلا جكيت، حافي، وإيديه على خصره بدل قشاطه، وفي جندي بستنّا فيه عالجهة الثانية معاه الجهاز اللي بمسح فيه على جسمك كلو .. لإنو واضح إنو الحج زلمة غلباوي وبجوز مهربلو شلن بجيبتو ما حطّو "عالقشاط"! من يومها صرت بس بدي أنزل عالجسر ألبس أواعي رياضة، مطاط وقماش، حتى بسطار أو أي إشي في معدن لأ! لسبب بسيط، اللطعة هاي اللي الناس بنلطعوها وخاصة النساء اللي معهم أطفال والكبار بالعمر حرام أي حدا بالعالم ينلطعها، فبحاول أمر من أول مرة بدون تيت وميت، عشان اللي وراي يمشوا عالسريع!
 

رابعا: التهيأة النفسية للمفاجأة الغير سارّة !
إنتو عارفين شو أول إشي الواحد بشوفه بس يطلع من حدود الأردن ويدخل فلسطين؟ شو فكركم؟ فلسطين صح؟ لأ! علم إسرائيلي من أكبر نوعية بنص خلقتك، يفضح إمو ما أبشعو! مش عارف أعبر ...
و بعد ما تطلع من جسر الخرة وبدك تركب بالباص، بتتطلع هيك لوهلة إنو "أنا بفلسطين!!!" بتلاقي الجبل الأجرد اللي عيمينك عليه تشكيل نجمة داوود بحجارة كبيرة! بتتطلع على شمالك كلها جنود إسرائيلين بنظاراتهم الشمسية المعروفة، حرام حساسين للشمس ما همّه أهل أوروبا، فش قدامك غير السما الزرقا فوق، بتضل تطلع بالسما لحد ما تسمع صوت الباص وصل.
انسمّ بدني وبديش أكمل، باقي الطريق لسا أسوأ! بتشوف القدس وسورها وإنتا بتلف حولين المدينة لإنو ممنوع تدخلها، بتشوف الجدار البشع المقرف كيف ماكل من الأرض أكل وبلف هيك مثل الحية يمين وشمال، بتضطر تتعامل مع مليون أخو محترمة على المليون حاجر اللي بوقفوك عليهم، ومرات بنزّلو الشباب وبلطعوك جمبب الحاجز إلى أن يجيء الفرج ... إشي بقرف. بس في النهاية، بتوصل، غصبا عنهم بتوصل، بست ساعات ،، بحدعشر ساعة، بيومين ،بتوصل .و كل القرف هذا بختفي بس تشوف وجه جدتك بتركض عليك !
سلام

http://naserz.blogspot.com