10 أسباب عشان تحضر "كومّستير"

1)     لإنو المسرحيّة بتضحكك على أشياء بتبكّي

2)     لإنو ما إلها علاقة بالمسخرة والتمسيخ، ولا تمت لصلة بمسرح العم الغافل أو زعل وخظرة (مع احترامي للجميع)

3)     لإنو أحمد حسن الزعبي إجا من الرمثا خصوصي عشان يحضرها، وحبها وانبسط فيها!

4)     لإنو فش حجر إلاّ مقلوب بالمسرحية، من المظاهرات، للتلفزيون الأردني، للانتخابات، لمجلس التعاون الخليجي، لاستقالة الخصاونة، للأيادي الخفية ...الخ الخ الخ

5)     لإنو اللي كتبها وأخرجها شب، واللي بمثلو فيها شباب

6)     لإنو المسرحية نجحت بدون دعم حدا أولاً، بعدين انعرضت في فندق وإجاها رعاية

7)     لإنو الممثلين خُرافيين ومحدش داري فيهم

8)     لإنو المسرحية بتعنيلك أكثر بكثير من 99% من مسلسلات رمضان

9)     لإنو لازم نشجّع الشغل المنيح والمسرح، قبل ما يموتوا الجوز

10)لإنو حضرتها مرتين وأنا "سلبي" و"بعجبنيش العجب".. هيك بقولوا!

نظرية الشحدة

مشان الله تقرأني، الله يخليك لإمك تكبس علي وتقرأني مشااااااااااااااااااان الله.. والله مش لاقي حد يعبّرني مششششششششششششششااااااااااااااااااااااااااااااااااااان الله تقرأوني يا جماعة الخير *يلطم النص على وجهه*، *عيون محمرّة مغرورقة بالدموع*... مشان الله الله يخلّيك اقرأني يا ياـ اتركلي تعليق تحت والله الحال على الله، بمناسبة ذكر الله: مشاااااااان الله مشاااااااااااان الله! *تطليعة الكلب الحزين* تعليق واحد بس طيب.. بعطيك علكة أنا ما بشحد *دمعة* مشاااااان الله!

يمكن هاي المرة الأولى اللي ما بتمنا أشوف فيها ولا تعليق! بس مع الأسف أسلوب الشحادين هذا واضح إنو بجيب نتيجة... كثير من أصدقائي بعد فترة من الاستماع الإجباري لموشح الشحاد/ الشحادة يخرجون بعضاً من النقود الفراطة ويكافؤون الشحاد بها على مثابرته! ودائماً نفس النقاش:

ولك ليش تعطيه؟ - حرام يا زلمة خلص

ولك ليش تعطيها؟- حرام يا زلمة مرة مسكينة

ولك ليش تعطيه؟ - ولك إنتا حيوان إنتا؟ مش شايفو/ شايفو ولد زغير؟ حرام

أي حرارة اللي اتطسكم يا أصدقائي يا حبايبي معلش اسمحولي فيها! أنا مستحيل أعطي شحاد شلن إلا في حالة وحدة، إذا كانت امرأة عجوز (كاتّه) بلاها الزمن بأولاد ومجتمع قميء بيضطرها لإنها تطلع تشحد.. غير هيك ولا يمكن! لعدة أسباب بسيطة

1)   في حال كان رجل/ شاب: اللي معطيه حيل يلف بين السيارات وتحت الشمس وضو القمر وبين الباصات والسرافيس عشان يسمعك الموشح تبعو، بيعطي حيل يشتغل! بس هو ما بدو! خاصة الشباب هذول الموضة الجديدة! شب طويل عريض فش فيه ولا علّه! قال بشحد وبعملّك بعنيه حزايني!!! ليش تعطيه؟ كل ما تعطيه شلن إعرف إنك بتعطيه 100 سبب إنو يرجع للشحدة بكرة ويضل عالة علي وعليك وعالبلد.

2)   في حال كانت امرأة/ فتاة: نفس القصة! لسا هدول بجلطوني بزيادة لإنو مسكنة النسوان غير وتأثيرها فعال أكثر! يخرب بيتك بيت ما تروحي تشتغلي أي شغلة نضيفة وتعيشي بكرامتك! ليش الشحدة؟؟؟ الجواب هو الشلن اللي بتطلّعو وبتعطيها اياه، كل واحد بيعطي شلن لشحاد أو شحادة بحكيلو: إوعا اتعّب حالك، هيك موفية معك أكثر، لليش تتعب وتشتغل زيّنا؟ هيّك ما انتا تعبان أصلاً، حقك تاخذ هالشلن! تعال بكرة بعطيك أكثر شوي.

3)   في حال كان طفل/ طفلة: وهاي الطامّة الكبرى بالنسبة إلي! الناس بيعطو الأطفال من حسن نية، مفكرين حالهم بساعدوهم... وأنا ما بلومهم عمشاعرهم، بلومهم على تسرعهم وقصر تفكيرهم وعدم تفكيرهم بمصلحة هذا الطفل، اللي كل ما رح يرجع عالبيت عند أخو القحبة اللي باعتو (أبو، أخو، العرص الكبير العامل عصابة شحدة، الخ) كل ما رح يرجع لعندو رح يقول والله هيو الولد "شاطر" وبجيب! وبرجع ببعثو اليوم الثاني وهكذا... يعني منّك ومن الشلن تبعك! لا ساعدت الولد ولا سخماط! الولد فش بإيدو إِشي يعملو! وفش ولد طبيعي بستمتع بهيك شغلة، بس الموضوع ماشي مع القرن اللي مشغله (مع الشكر الجزيل للشلن تبعك!)، فليش ما يرجع يبعتو؟

مشااااااااان الله ما تعطو شحادين مصاري، مشاااان الله! اللي بدو يتبرع بمصاري يحكيلي، في خيمة رمضانية للأيتام، وفي مبادرات أهلية كثير بتساعد الأطفال هدول وعائلاتهم، بإنها بتساعدهم على تأمين عمل لرب الأسرة أو الأم مثلا، أو على إنها تأمن قسط الأولاد بالمدارس إذا أهلهم ما بيقدرو، بإنهم يأمنولهم كتب أو مستلزمات أساسية ليقدرو يعيش منها... بس هاي مش شحدة وتشحيد، هاي مجتمع بساعد بعضه بالطريقة الصح، أنا بمدلك إيدي لما تحتاجني عشان توقف على رجليك، مش كل يوم أطعميك لقمة وإنتا قاعد متربع ومبسوط.


مشاااااااان الله تقتنع وتحكي لصحابك المرة الجاي :((( يا يا .. الله يجوزك ويخليلك أهلك مشان الله :(
----
ملاحظة: ما لقيت ولا صورة لشحاد بالأردن! فش عنا شحادين إحنا.. ما عاذ الله!
http://naserz.blogspot.com

رمضان معنا مش طبيعي شو حلو على التلفزيون الأردني

كالعادة ، يبجي رمضان ،والواحد زي كل سنة بفقدش الأمل بالتلفزيون الأردني لسبب أو لآخر و بجرب يحضر عليه شوي ...حطيت على برنامج "رمضان معنا أحلى"... في كمشة أوراق في يد المذيعة ( إعداد البرنامج) ، أكاد أجزم إنو المكتوب فيها هو التالي و فقط التالي :

1) رحّبي بالناس ،إحكيلهم صياما مقبولا و صحتين و خلافه

2) ترّن ترّن ، ردي عالتلفون ، قبل مرحبا و أهلين إسلخي الزلمة مليون مبروك كبيرة لإنو حكا معنا ، و من ثم تابعي :

بمجرد اتصالك معنا إنتا ربحت :

- ألف كاسة بلاستيك مقدمة من قهوة النـُص ؛ قهوة النص قهوة غلي مية بالمية ،بس إنتا صفّي النيـّة .

- أربمعمية بطيخة عالسكين مقدمة من معرش الحج اسماعين ؛ الحج اسماعين بطيختو حمرة ، ما بتطلع بيضا بالمرّة .

- مونة نكاشات سنان مدى الحياة مقدمة من شركة نكّاش السناينة ؛ انكش سنّك يا شبعان ،نكش المخ للزعران .

3) هسّا إرفعي راسك من هالورقة و اتطلعي عالكاميرا الظاوية ظو أحمر ،ما رح نحكيلك أي كاميرا شغالة ،لازم تدوري عليها عشان نبين إنّا عالهوا + ;)

4) بس تلاقي الكامير إسألي الزلمة إذا مبسوط ،مش مهم شو يجاوب ،يعني إذا حكيتلو "مبسوووووط يا ابو محمد؟" و جاوبك "كل شي من ألله منيح" مع نبرة خيبة أمل طنّشي ، شعب بعبيش عينو غير التراب . تابعي أسماء الشركات الراعية :

- و ياااا أبو محمد ربحت معنا كماااان 18 دزينة ملاقط غسيل (خشب) مقدمة من شركة علق أواعيك ؛ أنشر الغسيلات و ما تهاب ، من اليوم و رايح ما في نشر عالبواب ، علق أواعيك هيّة هيّة ، فخر الصناعة الصينيّة .

5) بتطمني المتصل إنو الكل معنا ربحان ، و إنو صار وقت نجرب نشغل السيارة ، و بتعطيها شعار شركة السيارات و بتعيدي الجملة ثلاث مرّات متتالية ، إعتبري حالك معلمة صف تمهيدي بتعطي درس "ألييييف أرنب ، بااااا بطّة ،تاااا تلاّجة!"

6) ربح السيارة هيو ربح ، ما ربح بتعطي أكمّن جائزة ترظية ، ليف جلي ،ملبس علوز، بوابيج بلاستيك لون أسود للحمام ،كولونات ستاتي ليكرا ، علاقات مفاتيح ، إختاري اللي بدك إياه

7) أعيدي قراءة الجوائز و شعارات الشركات الراعية

8) إحكي باي للي عالتلفون

9) إعتام

10) دعايات الشركات الراعية

11) ترّن ترّن ، ردّي عالتلفون - هسا إرجعي من أول الصفحة- .

...

كما أتقدم عن نفسي بالأصالة و الشعب الأردني بالنيابة بأخلص التهاني و التبريكات للسيد مدير عام مؤسسة الإذاعة و التلفزيون على خبر تجديد الثقة فيه و تمديد عقده ، إلى الأمام يا بطل ،أحسنت ، شوهـــــــد ، *توقيع* .

About Kamel Nsairat's رسالة رمضانية موجعة , By Anonymous

Deleted Upon request from the concerned  person .

Living without a TV during Ramadan

It's apparently possible ! who would've thought !! I don't know when it became an essential element of Ramadan ,but as long as I remember Ramadan was paired with watching a lot of TV to me, at 1st with Jordan TV's Maghreb prayer period and their candid camera show (don't tell me you didn't enjoy the one where the Shawerma M3allem almost kicked Rabee3 Sh-hab's (wish him to get well) ass :D!

But then this year,our TV broke before the month started,and for various reasons it remained this way till today , living without a TV is actually nice for a change, you read your news online,something I'm accustomed to since I spent much time abroad, more importantly ,you communicate more with other human beings,whether family or friends, and my favorite part is...you suddenly have the time you always wondered why isn't it there anymore to read ! Today we welcome back our precious TV and put our precious books to grow some dust on them again ... maybe !

2037 دراسة محلية : أفضل الأعوام للصيام

تخطيط إيماني بعيد المدى -

وفقا لدراسة حديثة ، حديثة للغاية ، قام بها السيد شوفير التكسي أمامي ليلة البارحة و أطلعني عليها شخصيا ؛ أفضل الأعوام لصيام شهر رمضان المبارك تمتد ما بين الأعوام 2025 إلى 2050/2051 . و فيما يلي التفصيلات :

دوافع الدراسة :

*الشوفير ينعطف من الإشارة شمال ، ينحني للأمام بمستوى "التابلو" و يمد يده تحت الكرسي ،يخرج قنينة مياه ،نظرة خاطفة عليّ* : تشرب ميّه ؟

أنا : صحتين شكرا .

السائق : يا أخي الواحد صار يعرف يشرب براحتو هسّا + ضحكة صفراء *يعب عبّة صغيرة* .

السائق : -أححح- يا رجل مش طبيعي رمظان هالسنة ، مش طبيعي ! .

أنا : آه شو بدك تسوي ،الله بعين .

السائق : بقلّك السنة الجاي لسا أطقع رح يكون الجو !

أنا : آه شو بدك تسوي !الله بعين !

السائق : و لسّا السنتين البعيديهن ؟الله لا يورجيك!

أنا : آه ؟ شو بدك تسوي ! الله يعين الناس و الله الأسعار نار !

السائق *مع نظرة استهجان* : الأسعار طولمالها بطلوع ،أنا بحكي عالجو ! شوف عليّ ...

معطيات عامة :

*ينخزني في ركبتي عشان أتبّع معو*

السائق : هسّا رمظااان...اللهم صل على سيدنا محمد ... كل ثلاث سنين برجع شهر لورا مزبوط ؟ *يتابع دون انتظار إجابة* يعني السنة الماظية بلش بشهر تسعة،السنة هاي بلش بشهر ثمنية ، السنة الجاي برظو بشهر ثمنية ،واللي بعديها بأول ثمنية ،هي 2009،2010،2011 !

*ثم أسهب في النظر في الأفق و أضاف*

ألفين و اطنعش،ألفين و ثلاطّعش ،و أربعطش ،شهر سبعة

ألفين و خمسطعش و ستطعش و سبعطعش ، شهر ستة

ألفين و ثمنطعش ،و تسعطعش و عشرين ،شهر خمسة

ألفين و واحد و عشرين، و ثنين وعشرين، و ثلاث و عشرين ؟ *يلتفت إليّ*

أنا : شهر أربعة !

السائق : شهر أربعة ، و بجيك يا سيدي أربعة و عشرين و خمسة و عشرين ،و ستة و عشرين ! هظول بجن بالربيع ،يعني بلش الجو أهون بلا(ء) !

أنا : *فرطت من الضحك ،ماشي،ألفين و أربعة و عشرين*

السائق : لأ ! أربعة و عشرين لسا بجي بآخر شهر أربعة ،الخمسة و عشرين بكون طقع للصيام !

أنا : طقع ؟ والله إنك انتا الطقع ،شو خطرلك تفكر بهالقصة ؟

السائق : *ابتسامة استحسان على وجهة ،و بحماس شديد يكمل* : هسا أنا بالنسبة إلي لسا اللي بعديهم أحسن ،بعِزّ الشتا أنا !يعني النهار قصير،فشّي شوب ،دوام قصير،الفطور بطوّلش.

أنا : آه منطق !

السائق *بحماسة مستمرّة* : ستة و عشرين،سبعة و عشرين،ثمنية و عشرين ؟

أنا : شهر ثلاث

السائق : تسعة و عشرين،ثلاثين،واحد وثلاثين شهر اثنين ، ثنين و ثلاثين،ثلاث و ثلاثين،أربعة و ثلاثين ،شهر واحد ،خمسة و ثلاثين ،ستة و ثلاثين،سبعة و ثلاثين ،شهر اطنعِش !

أنا : ..*ما أعطانيش مجال أعلق*

السائق : بالنسبة إلي يعني سنة ألفين و سبعة و ثلاثين من الآخر بتكون ، أقلّك ؟ من بعديهاااااا لحدّيـــــت *ثم سرح في الأفق قليلا و قال ضاحكا * : يعني لسنة الخمسين بكون الوضع تمام !

أنا : *فارط من الضحك* : طب و الواحد و خمسين شو بدك تعمل فيها ؟

السائق : أول إشي يا صاحبي بنقول إن ألله احيانا

أنا : *يهز رأسه موافقا*

السائق : بالواحد و خمسين يعني بدو يكون عمري فوق السبعين ،و وقتها عاد بتبطل تفرق عندي! ما أنا قاعد بالدار قاعد بالدار ،بعدين الحمدلله أنا أبوي صام للثمانين ....

ثم تحول الحديث عن المرحوم والده ،و المرحوم عمّه ، ثم عن مشاكل التركة ، ثم كيف سوف "يفرهل" السيارة بكرة ،و إنو ملوش اسبوع مستلمها و الخ من حديث السيارات اللي بفهمش منو إشي...

النتيجة :

طلب مني الشوفير -إن الله احيانا- و إجت سنة 2037 و كان عندي اولاد ، لما يجي رمضان أحكيلهم "بالزمنات يابا ،ركبت مع شوفير و قلّي إنو أحلى سنة للصيام هي ألفين و سبعة و ثلاثين،و "اتذكرنا و ادعيلنا" ".

ثم ناولته الليرتين و نزلت من السيارة مبسوط !

حزيرة رمضان- الحلقة الأولى و الأخيرة

عزيزي المواطن الفجعان

حط القطايف من ايدك و تعال هان

بحلق و شوف الرسمة هاذي

بفهمها إبن أول اعدادي

فيها العرض و فيها الطلب

و فيها السعر عالشمال انتصب

فكر منيح ولا تستعجل بالإجابة

ترى الكميّة سرّها عند المحتكر ابن ال--ادة

و الحكومة أخذت عطلة قبل الشهر الفضيل

جاوب هسّا ، عمين الحق بهالمسخرة ؟

صار عندك كل التفاصيل

يا معشر المفاجيع

إسمعـوا و اعـوا

http://www.youtube.com/watch?v=Ibwh3asswlo


http://www.youtube.com/watch?v=6NuxNtFhdXY

Explain this to me please !

How come we eat and consume in Ramadan month more than we do in any other given month even though we fast more than half of the 24 hours of the day ?

Was wondering this on the way home last night seeing the masses shopping for the holy month !

*الصورة تعبيريّة*

!