Jul 26, 2010

غالي والدم رخيص

مطلوب مطلوب مطلوب... كيلو دم مباشرة من المتبرّع وبدون وساطة البنوك. بس يعني بلا ثقالة دم بدي اياه يكون ثلثين بلازما وثلث صفايح، وتكون ميوعته نص بنص! وإذا في مجال أستلمه ملفوف بورق هدايا معرّق لون بنّي فاتح بكون أحسن وأحسن، أمّا السعر ما بنختلف عليه، عفواً، قصدي "الرسوم الرمزية اللازمة لإعداد الوحدة"، حاب تعاملني كأردني وتاخذ زيك زي غيرك 15 دينار كان به، بس بهاي الحالة مش رح أقدر أناولك التأمين الصحي تبعي كونه مرّة انغسل بجيبة البنطلون وتكاسلت أجدّده، فخلينا على سعر السوق لغير المؤمّنين: 30 دينار حلوات، بس أكثر من هيك ما بدفع، لا تفكروني مصري ولا سوري ولا فلسطيني وبدكم تدفعوني 40 ليرة! 0
وطلب أخير طبشة ميزان، بدّي عنوان "المصدر الذي فضّل عدم الكشف عن اسمه" في مقال جريدة الدستور في 25/7/2010 عشان أبعثلو الكيلو هديّه يوزّعو عليه وعلى كل واحد ببرّر وبدافع عن هاي المسخرة، بلكي صار عندهم نقطة دم واستحو على حالهم وظلوّا ساكتين عالأقل.0

وعراسي أبو الدراكيل
http://naserz.blogspot.com

9 comments:

Ahmad Hamdan said...

يا أخي أنا لحد هلأ بحاول أستوعب الموضوع, يعين بدكم الناس تعمل خير وفوق ما تعمل هالخير تدفع من جيوبها بزيادة, يعني مين اللي بدو يتبرع بدمو عشان يدفع مبلغ وقدره, في الكويت كان في ما مضى وما بعرف إذا لسة مطبقينها إذا بتتبرع بدمك بعطوك 10 دنانير كويتي بس يبدو أنو عنا بتشوف العكس دائما

Dr.Mohammed said...

انت ليش زعلان يعني؟ مهم بحكولوك الشغلة عالمية و في كل البلدان المتقدمة ! و احنا كدولة متقدمة لازم نكون السباقيين في هاد الموضوع

و بعدين انت شكلك مش فاهم الموضوع مليح ، بحكيلك المقال انو 60% من الدم اللي بطلع من الوزارة يستخدم باستخدام غير مبرر طبيا !!!! يعني شكلهم بهربو الدم لابو الدراكيل او كانهم خوف الله ، بشطوفو فيه الارضيات او بمسحو فيه الشبابيك و يا خوفي ، يا خوفي بكونو معلقين وحدات الدم بالثريات ، فكل هاي الاستخدامات غير مبررة طبيا ، شو مالك انت؟

عشان نحسم الموضوع افضل شي تعملو الحكومة انها تصير تشتري الدم ، مهي خربانه خربانه يعني، خليها تصير سمسرة عيني عينك اريحلنا

"نشتري وحدات الدم بافضل الاسعار"ا

NasEr said...

@Ahmad Hamdan
والله لو بدهم يدفعولي ما بتبرع بعد اليوم، إذا في حدا محتاج وبيعطو دمّاتي مباشرة بدون "رسوم" هيني تبرّعت، بدهم يبيعو مش متبرع، والمريض الله لا يرده مين قالو يمرض. الحق عليه

Dr Mohammed
أنو دول متقدمة يا زلمة بلا حكي فاضي، الناس أصلا بتحاول تغري شعوبها ويشجعوها على العمل التطوعي،ومش بايع دم، بعدين الحكومة ماصّيتو بلا واسطة.. هلا عمّي

لبنــــــــــى said...

بصراحة اول مرة اسمعها
بدنا نصير متل الدول المتقدمة ما عنا مانع
بس ليش سيرة الدول المتقدمة ما بتيجي الا على قفا هالمواطن المعتر بالدفع و الضرايب
لما نكون دولة متقدمة مامنة مواطنيها بالتعليم و التقاعد و التعليم و المدارس و ما خفي اعظم و المواطن بياخد راتب و بكفيه لاخر الشهر

ساعتها الدم بنباع و بنشرى
اصلا هم مو عارفين انو الدول المتقدمة ما عندهم دم اصلا لهيك بيتاجروا فيه

بعد اذنك
احمد حمدان بالفعل بالكويت بتتبرع بالدم بيعطوك فلوس حتى لو ما بدك اياها في صندوق للصدقات بتحطوا فيه و كمان بشربوك عصير برتقال فرش :))

و على راي رفيق
عماااااار يا بلد

sharar said...

هههه منيح لا احنا بفلسطين ما وصلنا لهذا التقدم وان شاء الله ما بنصلوا

واذا وصلنا ولا بد بفتحلي بسطه" البسطه عرباية بينباع فيها أشياء جنب ا لطريق " بسطة دم وببيع بالسوق السوداء بسعر أقل وانتو عارفين المحل

أنا ما بعرف كتير بشؤؤون الاردن الي زي هيك
بس أعتقد اما انهم نعسانين أو الدم بينباع لابو الدراكيل
بس مادام فرضو رسوم رمزيه ولا بد ادعو الله يستخدوا الريع الي على قفا المواطن لمشاريع تنمويه مش مشاريع دراكوليه

Em Ommar said...

خليك موديرن عمو قزعوط
إتطلع للجانب المشرق
إن وجد
ترى,, هيك بيصير الدم غالي
وبنبطل نسمع عن قصص ( غسل العار) وقصص( الدم الغير مطهر)
بيصير الواحد إزا إنجرح,, يحسب دمه بالشلم والبريزيه

خليك متفائل

اقصوصه said...

فعلا شيء محزن :(

NasEr said...

jafra
حأطع دراعي إزا في دولة متقدمة بتعمل هيك!

Sharar
إنتو دمكم مصيبة إذا سعّروه، فش حدا بقدر يشتريه بعدين، كتير غالي

Um Omar
مبدأياً انا هون ناصر مش قزعوط :) ثانياً، زمان ما سمعت حدا بحكي شلم :D
بس فكرتك حلوة، بتصير لزقة الجروح المستعملة أغلى من الجديدة !!

اقصوصة
شكراً لمرورك، أهلا بك في المدونة

Rula A. said...

الدنيا ماشية بإتجاه غريب..
ورق هدايا معرّق لون بنّي فاتح.. أظن فيه منو بضار ستي..

Post a Comment