Dec 25, 2009

إبعتلي جواب..جواب...و طمني ...ترلم ترلم ترلم


بس يستر على ولياك ما يكون من البريد الأردني هالجواب !!


ناصر، خمسٌ وعشرون ربيعاً، يهوى المطالعة، جمع العمل النقدية والمراسلة،one man,one desire!لا عنجد ! بحب أبعت وأستقبل رسائل وبطاقات بريدية -post cards- من وأنا صغير، بحس الرسائل المكتوبة بخط الإيد غير، مليون مرّة أحلى من الـ E-Cards والدواوين هاي، بس عندي مشكلة -برضو من يوم يومي-، هالبريد الأردني تعّب كلبي الله لا يتعب كلب حدا، طبعاً منذ الأزل وحتى يومنا هذا، البريد الأردني ما بوصّل الرسائل للبيوت، يعني من أكثر الأشياء اللي كنت أستمتع فيها بتايلاند وكنت أحسّها رفاهية مطلقة إنو عنواني البريدي هو عنوان سكني، مش زي هون، كل ما بدك تفتح حساب بالبنك ولا تعمل إشي بحكولك جيبلنا عنوان بريدي، والله ومن وأنا بالجامعة وكل ما بفتح حساب بشتغل هالتلفون وبنصير نتشحود بريد من صحابنا، سؤال يطرح نفسه : ليش يا ناصر ما تعملّك بريد وتريح راسك؟ جواب: لإنو نظام البريد اللي عنّا بسمحلك تقدم طلب لصندوق بريد بكل أول سنة فقط !! وهات عاد لما تيجي أول السنة يخطر عبالك تروح عالبريد وتطلب صندوق! غير هيك صراحة كنت دائماً أحس إنو من حقي إنو يوصلني البريد عالبيت، وإلاّ ما بيوم من الأيام يصير البريد يوصل عالبيت، لكني استسلمت وشكلي بدي أسجلّي صندوق بريد عأول السنة الجاي، المهم شو بدكو بطولة السيرة، قررت السنة أبعت كمشة بطاقات بريدية لأصدقائي حول العالم، من اللي عرفتهم شخصي و من اللي عرفتهم عالإنترنت وصرت صحاب معهم (ييييي...عندو صحاب من الإنترنت... شو عيب! بعرف! إنتو عندكم life أنا ما عندي! غيرو؟) ولملمنا هالأكمّن عنوان ورحنا ندور عبطاقات بريدية بهالمكتبات...و هات لاقي بطاقات بريدية!!! على علمي بلد سياحي إحنا ولا كيف ؟ مش البترا صارت عجيبة معترف فيها؟ فعلاً عجيبة إنو ما لقيت ولا بمكتبة من هاللي دورت فيهم بطاقات بريدية للبترا عالأقل! المهم حكيت مليش غير أروح عالأفغاني زي السيّاح، رحت، طلع عندهم بطاقات بريدية، والوحدة بعشر قروش يعني مش إنو غاليين بس المشكلة إنهم بخزو!!! فش غير وحدة للبترا حلوة، ووحدة تانية لوادي رم، أما الباقي؛ جرش : طالعة كإنها مصورة بكاميرا بولارويد بالستينات! بمزحش! البحر الميت...يا حبيبي عالبحر الميّت، فعلا بيعطيك شعور إنو هاد البحر والهوا كمان ميت بهديك المنطقة، ولاّ عمّان...الله الله الله...صورة للمدرج الروماني ومعمول حواليه حشيش أخضر فوتوشوب أنا بعمل أحسن منو، وهيك صورة باهتة ومش شغل واحد يبعتها لحدا ما عمرو شاف عمّان! والباقي من نفس الفصيلة، المهم أخذتلي تشكيلة، حكيت ببعت الأحلى للناس اللي بهموني أكثر، والناس اللي مضطر أبعثلهم (مثلاً ، تنين صحابك برة بس بطيقش واحد منهم شوي بس مضطر تبعتلو مجاملة كونو بعتلك قبل هيك) قلت هدول ببعتلهم واحد جرش وواحد عمان،أحسن أصلاً بديش يجو يزوروني! وبعدين بدأت معاناتي مع : كيف تبعث بطاقة بريدية من الأردن!!


باختصار شديد، بدك تضرب بالمندل عشان تعرف قيمة الطابع البريدي اللي بدك اياه، وفي حال عرفت، بدك جنّي (مسلم) يدلّك وين في صناديق بريد بشوارع عمّان، بعدين بدّك سبع حجابات وقرن فلفل أخظر مطحون مع حبة البركة و تحلّهم بكاسة مي وتشربهم عالريق عشان تتأكد إنو في احتمال يوصلو للجهة اللي انبعتتلهم (إسأل مجرّب!!) فالحل الأمثل إنك توصل البريد شخصياً، وصلنا البريد، ويا حظي السعيد، ثاني مكتب بريد فش عندو طوابع بريد (أبزق وألزق)، قال في بمكاتب تانية بس أنا ما عندي، فنظراً لإني قرفت وفش عندي وقت قررت أستسلم للأمر الواقع وأبعت البطاقات البريدية بطابع إلكتروني شنيع، يعني الطابع البريدي يكاد يكون أحلى ما في البطاقة البريدية (بعد الرسالة الصغيرة المكتوبة بخط الإيد) بس شو تعمل بالنحس عاد! فاللي رح يوصلو منكو بطاقة مني يسامحنا عالطابع الجميل اللي عليها، والله عنّا طوابع بريدية حلوين بس قد ما هم حلوين بخلصو بسرعة من مكاتب البريد، عشان هيك يعني مش لإشي!
 
وسلامتكم، والكلام للجميع، ولا تهون!.


ملاحظة: ضايل عندي أربع بطاقات قاعدين، (من الحلوين)، اللي بدو يبعتلي عنوان وبنحاول نحصّلو طوابع أبزُق و ألزُق.

http://naserz.blogspot.com

12 comments:

Anonymous said...

looool!! ana b3atet la akram el saneh el madieh betaka 3al s3odieh, ra7at 3al riad b3dain 3al madineh bs weslat!! m3 ino ma twaqa3et tosal! anyway ana b3atha 3an 6are2 bareed el shirkeh, so ma t'3albet, fa eb3at m3 bareed el shirkeh kter ashal :))

Farah Batarneh said...

LoooooooL ..
bat5ayyal hon bel ordon zay zaman
lamman kano yeb3ato bel 7amam el zajel hehe .. boosal b3d 50 saneh ymkn

2al bareed ordoni 2al !! la sho?
mshan yeray7o el muwaten!! la ma bestahal yerta7 :D

Yazid said...

3ad hdak el youm ro7et ba3atet la kteer blad barra lal modara ta3ooni bel sho3'ol ma wajahet ayya mashakel fannyeh :D bel bareed ta3 el shmaisani :)) i think you should try it :)

NasEr said...

Anon
ma ana ra7 asta2bel 3a bareed el sherkeh ba3rafesh iza beb3atoole though ,i'll ask :D

Farah Batarneh
just to be fair to the Jordan post, their services has improved a lot along the years,but still not what one hopes for.

Yazid
hay 7asad tajrobet sawat ya ebne ana men w ana bel madraseh bab3at bareed, as i said and repeated twice it was bad luck,i just happen to have a blog where I can rant about the imperfect services :D

Farah Batarneh said...

Naser ..
al 7aq yoqaal .. yeah they may have improved .. i actually havent tried it personally bs basma3 3an mo3anat el nas .. elli jarrbo zayak
any ways ya rb yedal b progress :D
ma bnez3al ;)

zeina said...

Hahahaha that just made my day!
I got some old post cards that belong to dad :D
I love reading old letters! It's a lot more personal, with the handwriting and all!
I'll be waiting that post card :)

NasEr said...

Farah Batarneh
btw,i just noticed,you're initials makes for FB! ppl may confuse you with facebook :D so ah,el mohem el progress u're right :D

zeina
and I'm waiting yoursss..send them already yalla

Rula A. said...

أنا كتير بحب اشتري Greeting Cards ،،
بحس انهم Very artistic..
ههههه بتذكر من مصغري وإحنا عنوانا البريد على عنوان بريد سيتي،، بس من شي ٦ أشهر أخيراً صار عنا واحد النا..
بس ناصر أظن إنو احنا عم نتطور بشويش..يعني عندك شغلة إنو رقموا البنايات وحطوا آرمات بأسماء الشوارع..والناس صار لماً بدهم يصل مكان يسألو عن إسم الشارع ورقم البناية بطلوا؛ بعد تاني مطب عل يمين..
فأظن إنو في إحتمال عن قريب نشوف IlPostMan
ناصر مو شرط انك تاخد واحد على أول السنه! عشان احنا ماما لماً سوت واحد النا كان في الصيف وكانت مارقة بالصدفة على مكتب البريد إلي عنا بالمنطقة وسألت عن الموضوع قالها الزلمة إنو احنا عن جديد وسعنا مكتب البريد وضفنا صناديق بريد جداد فإذا بدك واحد بتقدري تاخدي.. كانت محظوظة هداك اليوم..
ذكرتني الصيفيه إلي مضت كنت بالعقبة وكان بدي أجيب من هدول الGreeting Cards
وفعلاً الواحده ب ١٠ قروش والصور كتير قديمه كنهم معمولين بالثمانينات ويادوب طلعت ٥ حلوين..
بس قبل فترة في حد كان عامل مسابقه إنو أجمل صور لعمان عشان بدهم يغيروا هدول القدام وفعلاً في ناس فازت صورهم.. بس بعدين مابعرف شو صار بالموضوع..
أنا ماعمري شفت صناديق بريد في عمان..أو يمكن في بس أنا ماعمري انتبهت الهم..
طب صرت حدة الطبع هو نوع بزق ولزق؟ ولا إلكتروني؟ معلش بس عشان أنا ما بعرف بهاي الأشياء..

Jundi said...

i would recommend using courier companies instead .. pricier sure but waaaay faster and more reliable .. aramex, dhl, ups, fed ex, zai hadol ya3ni

Master of Ceremony said...

I feel lucky because I have memories of the post man with his big postman bag on his shoulder passing by my grandparents' house every week to give them letters, or simply chat and reflect on life.
That wasn't in Jordan, and like 25 years ago or so, during civil war!

zuzikabdo said...

3omri ma ba3atet maktoob la7ada ..la 6awabe3 wala '3ero !!
the closest thing i got is wrighting on an autogragh 15 years ago .. something like " atamana laki alnaja7 wa akl altofa7. fe almakloob le tadoom fe alkoloob "
and as i was reading the comments, i think rula have got a point about a better changes soon ..

NasEr said...

Rula
el rasa2el el 3adeyyeh be7otoolha tabe3 electrony, dunno if its possible to have the old one upon request,I'm thinking I should start a post card business!

Jundi
I use those for the important stuff, part of the mail joy for me is the long time it takes n all that,does that make sense? :d

MOC
were those good or bad ones? I mean given the time when they occurred,war !?

Zuzik
lol,had ayyam "dafater el zekra" wel kroot elle men el maktabeh em el shelen :DDDDD

Post a Comment