إبعتلي جواب..جواب...و طمني ...ترلم ترلم ترلم

بس يستر على ولياك ما يكون من البريد الأردني هالجواب !!

ناصر، خمسٌ وعشرون ربيعاً، يهوى المطالعة، جمع العمل النقدية والمراسلة،one man,one desire!لا عنجد ! بحب أبعت وأستقبل رسائل وبطاقات بريدية -post cards- من وأنا صغير، بحس الرسائل المكتوبة بخط الإيد غير، مليون مرّة أحلى من الـ E-Cards والدواوين هاي، بس عندي مشكلة -برضو من يوم يومي-، هالبريد الأردني تعّب كلبي الله لا يتعب كلب حدا، طبعاً منذ الأزل وحتى يومنا هذا، البريد الأردني ما بوصّل الرسائل للبيوت، يعني من أكثر الأشياء اللي كنت أستمتع فيها بتايلاند وكنت أحسّها رفاهية مطلقة إنو عنواني البريدي هو عنوان سكني، مش زي هون، كل ما بدك تفتح حساب بالبنك ولا تعمل إشي بحكولك جيبلنا عنوان بريدي، والله ومن وأنا بالجامعة وكل ما بفتح حساب بشتغل هالتلفون وبنصير نتشحود بريد من صحابنا، سؤال يطرح نفسه : ليش يا ناصر ما تعملّك بريد وتريح راسك؟ جواب: لإنو نظام البريد اللي عنّا بسمحلك تقدم طلب لصندوق بريد بكل أول سنة فقط !! وهات عاد لما تيجي أول السنة يخطر عبالك تروح عالبريد وتطلب صندوق! غير هيك صراحة كنت دائماً أحس إنو من حقي إنو يوصلني البريد عالبيت، وإلاّ ما بيوم من الأيام يصير البريد يوصل عالبيت، لكني استسلمت وشكلي بدي أسجلّي صندوق بريد عأول السنة الجاي، المهم شو بدكو بطولة السيرة، قررت السنة أبعت كمشة بطاقات بريدية لأصدقائي حول العالم، من اللي عرفتهم شخصي و من اللي عرفتهم عالإنترنت وصرت صحاب معهم (ييييي...عندو صحاب من الإنترنت... شو عيب! بعرف! إنتو عندكم life أنا ما عندي! غيرو؟) ولملمنا هالأكمّن عنوان ورحنا ندور عبطاقات بريدية بهالمكتبات...و هات لاقي بطاقات بريدية!!! على علمي بلد سياحي إحنا ولا كيف ؟ مش البترا صارت عجيبة معترف فيها؟ فعلاً عجيبة إنو ما لقيت ولا بمكتبة من هاللي دورت فيهم بطاقات بريدية للبترا عالأقل! المهم حكيت مليش غير أروح عالأفغاني زي السيّاح، رحت، طلع عندهم بطاقات بريدية، والوحدة بعشر قروش يعني مش إنو غاليين بس المشكلة إنهم بخزو!!! فش غير وحدة للبترا حلوة، ووحدة تانية لوادي رم، أما الباقي؛ جرش : طالعة كإنها مصورة بكاميرا بولارويد بالستينات! بمزحش! البحر الميت...يا حبيبي عالبحر الميّت، فعلا بيعطيك شعور إنو هاد البحر والهوا كمان ميت بهديك المنطقة، ولاّ عمّان...الله الله الله...صورة للمدرج الروماني ومعمول حواليه حشيش أخضر فوتوشوب أنا بعمل أحسن منو، وهيك صورة باهتة ومش شغل واحد يبعتها لحدا ما عمرو شاف عمّان! والباقي من نفس الفصيلة، المهم أخذتلي تشكيلة، حكيت ببعت الأحلى للناس اللي بهموني أكثر، والناس اللي مضطر أبعثلهم (مثلاً ، تنين صحابك برة بس بطيقش واحد منهم شوي بس مضطر تبعتلو مجاملة كونو بعتلك قبل هيك) قلت هدول ببعتلهم واحد جرش وواحد عمان،أحسن أصلاً بديش يجو يزوروني! وبعدين بدأت معاناتي مع : كيف تبعث بطاقة بريدية من الأردن!!

باختصار شديد، بدك تضرب بالمندل عشان تعرف قيمة الطابع البريدي اللي بدك اياه، وفي حال عرفت، بدك جنّي (مسلم) يدلّك وين في صناديق بريد بشوارع عمّان، بعدين بدّك سبع حجابات وقرن فلفل أخظر مطحون مع حبة البركة و تحلّهم بكاسة مي وتشربهم عالريق عشان تتأكد إنو في احتمال يوصلو للجهة اللي انبعتتلهم (إسأل مجرّب!!) فالحل الأمثل إنك توصل البريد شخصياً، وصلنا البريد، ويا حظي السعيد، ثاني مكتب بريد فش عندو طوابع بريد (أبزق وألزق)، قال في بمكاتب تانية بس أنا ما عندي، فنظراً لإني قرفت وفش عندي وقت قررت أستسلم للأمر الواقع وأبعت البطاقات البريدية بطابع إلكتروني شنيع، يعني الطابع البريدي يكاد يكون أحلى ما في البطاقة البريدية (بعد الرسالة الصغيرة المكتوبة بخط الإيد) بس شو تعمل بالنحس عاد! فاللي رح يوصلو منكو بطاقة مني يسامحنا عالطابع الجميل اللي عليها، والله عنّا طوابع بريدية حلوين بس قد ما هم حلوين بخلصو بسرعة من مكاتب البريد، عشان هيك يعني مش لإشي!
 
وسلامتكم، والكلام للجميع، ولا تهون!.

ملاحظة: ضايل عندي أربع بطاقات قاعدين، (من الحلوين)، اللي بدو يبعتلي عنوان وبنحاول نحصّلو طوابع أبزُق و ألزُق.

http://naserz.blogspot.com