يعني لو كان سعد الحريري رئيس وزراء....عندو نفط !؟

أجدد فيديو فايع في العالم العربي، سعد الحريري في مجلس النواب وهو يتلعثم بالكلام، عالفيس بوك، عالمدونات، عالموباليلات، بالإيميلات، إللي عندو ثلاّجات غسالات راديات مسجلات تلفزيونات كنبايات عتيـقة للبيييييع...

الصراحة سياسة لبنان معقدة زيادة عن اللزوم وعندي شعور إنو عمري ما رح أفهمها، ولذلك بس حبيت أوضح إني بكتب الآن مش دفاعاً عن سعد الحريري ولا غيرو، بس حاب أحط أصبعي بعنيكو، أو عنينا بالأصح، ولأني بكره لما الناس "تنهجن" على إشي ولما الكل يصير يقلد التاني عالعمياني وبغباء وبدون تفكير لمجرّد إنو موضوع معيّن عامل ضجة، لإنو عادة هاي الأمور بتيجي وبتروح والناس بتفيع عليها وتاني يوم بنسوها، مثال: حرب غزة الأخيرة، محمود درويش، الخ... نرجع لموضوع سعد الحريري، إحنا شعوب جبانة بشكل مش طبيعي، و ما بنستقوي إلاّ عالأضعف منّا ،في وجه الضعيف فش أشطر منّا بالنقد والمسخرة، أمّا عند القوي بنأرنب وبنصير نوتوت لحالنا أو حتّا بنتحسّر بعقلنا بلاش حدا يسمعنا ! يعني اللي عمرو فيكم حضر قمّة عربية، أو اجتماع رؤساء وزراء عرب لقمّة طارئة أو غير طارئة، أو سمع وزير دفاع دولة خليجية يلقي بيان، أو مسؤول سعودي يتحدث عن تجهيزات الحج أو غيرو...بعرف إنو معظمهم مش أفضل من سعد الحريري، بل أسوأ بمرااااحل، خاصة جماعة اللحى وال"متدينين"، إللي المفروض بقرأوا القرآن 5 مرّات يومياً عالأقل،( بالمناسبة، التفسير الوحيد اللي وجدته لهاي الظاهرة، إنو بلكي هدول الجماعة بعملو زي ما كنت أعمل و أنا صغير لما أجي أصلي، دايماً كنت أقرأ سورة الإخلاص "أو: قل هو الله أحد" وسورة الفلق "أو: قل أعوذ برب الناس" بكل صلاة لأنهم قصار، يمكن عشان هيك لغتهم العربية ركيكة)، المهم، فالصراحة قاعد بفكّر...لو سعد هالحريري كان رئيس وزراء دولة قوية وعندها نفط...كان حدا فيكو تفلسف وعمل فيها أبو العرّيف اللي بغلطش ولا بحرف ؟ والله بشك ! على الأقل، خلينا نقدّر إنو بلبنان مسموحلك تحكي للأعور أعور بوجهو بدون ما تخاف على حياتك وأولادك وشغلك وعيلتك الخ الخ الخ... وتذكروا إنكو بتقدروش تتخنفسو لما شوفير التكسي يبلّش يتشكون عالأسعار وعالحياة الصعبة لإنكو بتخافو يكون بدو يسحب منكو حكي ويسحبكوا النمل بعديها، يعني كل هاللي نشروا فيديو الحريري، ممتاز، المرة الجاي اللي بصير إشي بحتاج الناس تفتح ثمامها عشانو، يا ريت نشوف هالحماس المتّقد بصب باتجاه إشي مفيد، على سبيل التغيير يعني بس

و في النهاية... قلعاط اللي يقلعطنا ما أتفهنا!

http://naserz.blogspot.com