كميل وزميل، شو عاملين عالنيويير؟

كميل: شاب عمّاني طويل ورأسه بارز بشكل مربع بعض الشيء، نحيف ويلبس جوكيت جلد بنّي ما عندو غيرو، بنطلون جينز أزرق -كاحت- وبسطار أسود مش لابق مع الجوكيت البنّي، يوحي بالعباطة لكنه طيب وعلى نياته، نفسو "يعمل إشي" عالنيويير، يعمل مهندس كمبيوتر بشهادة جماعية،و شهادة والدته بذكائه.

زميل: زميل كميل منذ سني الجامعة، قصير ورأسه مدور بشكل بارز بعض الشيء، أصلع وشعره منبّز شوي، صوته غليظ بسبب التدخين، يلبس طاقية سوداء صوف إم الليرة (اللي عليها ماركة adibas) لكن بشكل ستايلش، يملك سيارة كيا لون خمري، نفسو "يعمل إشي" عالنيويير، كميل يملك محل موبايلات.

في مكان عمل كميل جرى الحوار التالي:

البنت اللي مكتبها جمب مكتب كميل (عبير): "أوكي أوكي...لأ شو مزرعة سامر ما مزرعة سامر، تسؤ تسؤ، ما بطيء نص الناس اللي رايحيين،...خلص بحكي ميرا وبشوف وين طالعين، بلكي بنروح معهم عبيروت خلص أريح"، ثمّ أردفت قائلة: شو كميل؟ شو عامل عالنيويير؟

كميل - بحط راسو بشاشة هالكمبيوتر وبعمل حالو مركز، يتمتم لنفسه-: إتش تي إم إل، لأ... الكود هاد ضارب يلعن أخت جوجل (أو غوغل) شو إنهم تيوس...

البنت اللي جمب كميل -تقاطعه-: ولك كميل، إحكي، شو رح تعمول عالنيويير؟

كميل: والله مانا عارف...جاعبالي السنة أقعد بالدار مع الحجة، كل سنة بطلع وهيك، بدي أغير جو السنة بالدار، زمان ما عملنا بارتي (بتشديد الباء) بالدار.

عبير: آه طيب كول، أحلى إشي الصراحة، عشا وصحاب وهيك

كميل -سابح في خياله- : آه..

قام كميل وراح عالحمام، اتطلع بهالمراي اللي قدامه، لعب بشعراتو المتكتكين وقال: يلعن روما، يلعن عمرك ما أزكاك، شو ناقصك إنتا عشان تعمل إشي عالنيويير؟، والله لأعمل إشي زيي زي هالعالم.

رفع تلفون على زميل...ترررم تررررم، ودار الحوار التالي (إحنا رح نسمع كميل بس،لغايات الشفافية في نقل الصورة):

ألو؟ زميل؟ وك كيفك؟ وين أيامك؟ حبيبي، الله يخليك، تسلم، والله وأنا، اشتاقتلك العافية، كيف حالك؟،شو الأخبار؟، كيف الشغل؟، الله بعين والله السوق واقف وين ماكان يا خوك، آه منيح الحمدلله بسلم عليك، المهم كيفك إنتا؟، طيب تمام، كيف الشغل طيب؟شو في أخبار؟ طيب المهم...إسمع، كنت بدي اسألك...شو عامل عالنيويير؟ ،عراس السنة يعني يا بقرة!، بيتوتي؟ الله يقطع بيتوتي! بدنا نفيع يا زلمة مشان القرود!!شو بعرفني، خنروحلنا محل!،خلص ماشي، بيناتنا ألو معناتو.

ثم عاد قافلاً من الحمام وعلى وجهه ضحكة عريضة، وقال: "طالعين!" التفتت البنت اللي جمب كميل عليه "شو؟"، ردّ : بقلّك طالعين، مش سألتيني شو عامل عالنيويير؟ طالع طالع!!!. استهجنت البنت الحماس الزايد عند كميل، بس سايرتو: أوك إنجوي،إحنا خلص طالعين عبيروت، إحنا وصحابنا، قررنا نقاطع حفلة المزرعة لإنو الناس شوي حفرتل. ردّد كميل خلال جولة السباحة الثانية في خياله: إنجوي!!

روّح كميل ولاقا زميل عالموعد، عالساعة ستة ونص مساءً، لإنو سمع بالشغل إنو في إشي إسمو "بري بارتي"، حفلة استباقية يعني بالعربي ،- بعد ما ترجمها على جوجل لانجويجيز-، طلع بهالسيارة، "يالله يا معلم، حفلتنا الاستباقية بلّشت" وعلاّ الراديو واندمج مع أغنية "ليتس جو تو ذا كاندي شوب" وكمّل الأغنية "أول إنجيليش، أول زا تايم" بس استغرب ليش المغنّي نسي هاد المقطع، نظر إليه كميل نظرة شزرى وأردف قائلا: يا ولد كنّك انهبلت انتا؟ مالك هيك زي اللي ركبك عفريت،شو قاعد بتهذرب، شو حفلة استباقية؟هاي هي الحفلة الاستباقية؟ البين يطسّك ما اهبلك!

فعلاً، البين طس كميل وطفى نار الحماس المتّقد في داخله كونه لأول مرّة بكون مشارك رسمي بالنيويير، فجلّس وقال "طب شو بدك نسوي؟"، رد عليه زميل "بنروح عالشونزيليزيه شو رأيك،هاهاها" ثم داعب كميل -بلا قافية- وصالحه عشنّو طسّو وقلّو هسا بودّيك أحلا حفلة استباقية، ضرب سويتش وراح فيه على مطعم هاشم، بعدين جزدرو بالبلد، ولفلفو بجبل عمان، وعبدون، والصويفية، وشارع الوكالات، يعني الجولة المعتادة، بس المرّة هاي كانت تملؤها البهجة والسعادة -على الرغم من الجو البارد والمغص الذي أصاب زميل قد ما أكل فلافل-، كونهم "عاملين إشي" عالنيويير!

وصارت الساعة 11:30 بالليل، والشباب مش عارفه وين بدها تقضي ساعة الصفر...قامو قرروا إنو أحسن إشي يفيعو عالفيسبوك، عالأقل أكيد في ناس ثانية رح تكون قاعدة ببيتوتها أو شابكة من موبايلاتها، وهيك يعني بأمّنو أكبر قدر ممكن من التفاعل مع العالم، دوّروا على إنترنت كافيه وقعدو، هُب طُب ولا في إيفينت عالفيسبوك قال الناس بدها تحتفل بالنيويير عالدوار الأول!! يا سلام! هاظ جمبنا، كبس كميل على "attending" وسلخ status عالسريع "عامل إشي عالنيويير" وجر زميل من إيدو وطيار عالدوار الأول!

لقو العالم فوق بعض، ولبيل ما لقو صفّه ونزلو من السيارة وبلشو يركضو باتجاه الدوار الأول سمعو العد التنازلي، وفاعت الناس وصرنا بألفين وعشرة وهم بركضو ومش واصلين، بس مع ذلك، صارو ينطنطو وهم راكضين ويصفرو، وصلو الدوار الأول من هون كانت الناس بلشت ترجع عسياراتها من البرد، وكان كميل بطّلع بوجوه الناس كلها ومبسوط، "هابي نيو يير" "هابي نيو يير" "هابي نيو يير" بعدين وقّف فجأة وانلخم وتمسمر بأرضو: "ولك عبير؟؟!!"

العبرة يا إخوان، فكّونا من العرط الزايد، وروحو عجبل عمّان،الموضوع عن جد..

باي ذا ويه، شو عاملين عالنيويير؟

http://naserz.blogspot.com